Ոչ եւս է Լեհաստանի Երբեմնի Առաջնորդ` Կարդինալ Ժոզէֆ Կլէմբ։

23 յունուարի գիշերը Վարսավիայի երբեմնի եպիսկոպոս եւ Լեհաստանի երբեմնի Առաջնորդ` Կարդինալ Ժոզէֆ Կլէմբ, 83 տարեկանին կնքեց իր մահկանցուն։ Ան եղած է իր երկրի եկեղեցական եւ քաղաքացիական կարեւոր դերակատարներէն մին։
Կարդինալ Կլէմբ ծնած էր 18 դեկտեմբեր 1929-ին Ինովրոքլավ շրջանի մէջ։
1950-ին կը մտնէ Կնիէզնոյի նորընծայարանը ուր 1956-ի մայիս 25-ին կը ձեռնադրուի քահանայ։ 1958-ին հռոմի Լատերանեան համալսարանի մէջ կը հետեւի ''Եկեղեցական Կանոնագրութեան'' դասընթացքին եւ 1964-ին կը ստանայ Համալսարանական ''Տոքթորա''։ 1979-ին եպիսկոպոս կը ձեռնադրուի եւ 1981-ին Վարսավիայի եպիսկոպոս կ՛անուանուի ու կը դառնայ նաեւ Լեհաստանի Առաջնորդ։
1983-ին ՅՊԲ Սրբազան Քահանայապետը անոր կը շնորհէ կարդինալական տիտղոս։ 1981-էն մինչեւ 2004 Կարդինալ Կլէմբ եղած է նաեւ Լեհաստանի եպիսկոպոսական համահաւաք դասի Նախագահ։
Կարդինալ Կլէմբի մահով կարդինալական դասի թիւը կ՛իջնէ 210-ի որոնցմէ 120 ընտրող կարդինալ եւ 90 ոչ ընտրող։